De femieje is compleet, eine thriller es bouk en es loesterbouk in ’t Zittesj!

Naodat in december ’t bouk MO woort oetgegaeve, is dan noe ouch ’t loesterbouk oetgekómme. Daomit is de ‘femieje MO’  compleet! Neit eerder waar eine thriller in ’t Zittesj gesjreve. En neit eerder waar ein bouk in ’t Zittesj oetgegaeve es loesterbouk.

’t Begoosj allemaol mit ein idee, en ’t haet ein jaor of twee gedoerd veurdat de téks zo wied waar dat ’t tied woort om eine punt achter ’t verhaol te zétte – zo wied. MO woort oetgegaeve en de verkoup waar wie verwach erg goud! Bliekbaar höbbe väöl luuj interesse in dit nuuj fenomeen. Mer waat ouch aangegaeve woort: luuj vénje ’t léstig om te laeze in ’t Zittesj. Om ’t mèkkeliker te make, laeze ze dan hélop. Dat brach de sjriefster Lizette Colaris op ’t idee om dan ein loesterbouk te gaon opnumme. Ze heilt audities veur luuj die wólle mitwirke, en van de 50 aanmeljinge haet ze 14 luuj oetgekaoze. Zelf noum ze de rol van vertéller op zich. Marc Verblakt oet Zitterd bleek te besjikke euver precies de juste studio en techniek om dit werk te doon, en al gaw ware de opnames gereid. Lizette bedach ein ontwerp en vónj ein firma die dit koosj oetvuiere. En noe is ’t dao: ’t allereesjte loesterbouk in ’t Zittesj – of mesjien waal in ’t Limburgs überhaupt!

’t Is Lizette gelök om ein en anger zónger subsidies te doon. Häör eige sjpaargeldj woort ingelag, en noe is de houp dat ’t loesterbouk sjus zo goud zal verkoupe es ’t bouk. Dan zeen de köste d’roet en ként aan ein nuut project gewirk waere! Waat dach geer van ein kénjerbouk in ’t Zittesj? Om mer get te nuime.

Muite mit laeze van ’t Zittesj? Sjaf dan zowaal ’t bouk es ’t loesterbouk aan, en heur mit waat geer doot laeze. Op die maneier wurt dat Zittesj laeze heel flot gemekkelik!

Zowaal ’t bouk es ’t loesterbouk zeen te kriege bie Boukhanjel Krings en via de webshop van dees website. Maile nao menstaal@gmail.com kent ouch!

Allebei de buik kómme 15 euro, biejein koste ze 27,50 euro.